МОХИда Aурелиа Бушез ва Aдриан Фов билан учрашув бўлиб ўтди

Жорий йилнинг 24 январь куни Марказий Осиё халқаро институтида Франциянинг Ўзбекистондаги Фавқулодда ва мухтор элчиси О.Бушез, Франциянинг Марказий Осиё тадқиқотлари институти (IFEAC) директори A.Фов ҳамда Франциянинг Ўзбекистондаги элчихонасининг маданият ва ҳамкорлик бўйича маслаҳатчиси Л. Ориоль ўртасида учрашув бўлиб ўтди.

Суҳбат чоғида О.Бушез Президентимиз Ш.Мирзиёев раҳбарлигида олиб борилаётган ташқи сиёсат ва амалга оширилаётган ички сиёсий ислоҳотлар, шунингдек, бутун Марказий Осиё минтақасини тубдан ўзгартирган ташқи сиёсат курсини юқори баҳолади.

У икки давлат раҳбарлари Ўзбекистон Президентининг 2022 йил ноябрь ойида Францияга давлат ташрифи доирасида ўзаро муносабатлар ва юқори даражадаги ҳар томонлама шериклик муносабатларини ривожлантиришга келишиб олганини таъкидлади.

Шу билан бирга, О. Бушез Ш.Мирзиёевнинг Францияга ташрифи доирасида “Карвон йўллари чорраҳасида” ва Aраб дунёси институтида ташкил этилган “Самарқандга йўл.  Ипак ва олтин мўжизалари” намойиши хусусида тўхталди.

Учрашув якунида, дипломат Франция ва Ўзбекистон муносабатларини янада мустаҳкамлашда икки давлат илмий-таҳлил марказлари ресурсларидан самарали фойдаланиш таклифини билдирди.

IFEAC директори A.Фов МОХИ билан келишувга эришиш катта муваффақият эканини таъкидлади. Шунингдек, МОХИ экспертларининг Франция ва Бишкекда амалиёт ўташ имкониятларини кўриб чиқишни таклиф қилди. Шунингдек, баҳорда Тошкентда икки таҳлил институти экспертлари иштирокида қўшма илмий анжуман ўтказиш мақсадга мувофиқлигини билдирди.

Мухтасар айтганда, Томонлар мунтазам мулоқотни давом эттиришга, МОХИ ва IFEAC ўртасидаги илмий ва академик ҳамкорлик режасини ишлаб чиқишга келишиб олдилар.