Sudyalar oliy kengashi raisining ta’kidlashicha, sudyalar korpusi tarkibini yangilash bo‘yicha ko‘rilgan chora-tadbirlar natijasida o‘tgan yili sudyalik lavozimlariga ko‘rsatilganlar soni sud tizimidan ketgan sudyalar sonidan ortib ketgan.

Davlat rahbari tomonidan sud-huquq tizimiga aniq soha mutaxassislarini jalb etish yuzasidan berilgan topshiriqni bajarish maqsadida ilk bor huquqning alohida yo‘nalishlari bo‘yicha huquqshunoslar o‘rtasida tanlov o‘tkazildi. Tanlov g‘oliblari tuman bosqichini chetlab o‘tib, darhol viloyat sudining sudyasi bo‘lishlari mumkin.

Bundan tashqari, Prezidentga Kengash faoliyatini institutsional jihatdan mustahkamlash va sud kadrlari masalalarini uning vakolatiga o‘tkazish, shuningdek, sudyalarning intizomiy javobgarligi institutini takomillashtirishga qaratilgan reja haqida ma’lumot berildi. Shu bilan birga, sudyalarni tanlash tizimini takomillashtirish, uning shaffofligi va samaradorligini ta’minlash borasidagi ishlar davom ettiriladi.

Yig‘ilish yakunida Davlat rahbari qator aniq topshiriqlar berib, sud-huquq tizimidagi islohotlarni sifatli amalga oshirish zarurligini ta’kidladi.