“Bir qator umumta’lim maktablarini qurish va jihozlash, 5-bosqich” loyihasi bo‘yicha tegishli kelishuvni Tojikiston moliya vaziri Fayziddin Qahhorzoda va Saudiya taraqqiyot jamg‘armasi bosh direktori Sulton Abdulrahmon Al-Marshad imzoladi.
Loyihaning umumiy qiymati 20 million dollar bo‘lib, u to‘liq Saudiya taraqqiyot jamg‘armasining imtiyozli kreditlari hisobidan moliyalashtiriladi.
Bu mablag‘ kelajakda 30 ming o‘quvchi ta’lim olishi mumkin bo‘lgan 19 ta maktab qurilishiga sarflanadi. Loyiha joriy yilda boshlanadi va 2028 yilda yakunlanishi kutilmoqda.
Shuningdek, manbaning ta'kidlashicha, 2017 yilning may oyida imzolangan “Bir qator umumta’lim maktablarini qurish va jihozlash, 4-bosqich” loyihasi bo‘yicha kredit shartnomasi doirasida 9 oktyabr kuni Shahrinavda 620 o‘rinli yangi maktab foydalanishga topshirildi.
Bu loyihaning to‘rtinchi bosqichi doirasida Tojikistonning turli hududlarida 34 ta umumta'lim maktablari qurilgan. Ushbu bosqichning umumiy qiymati 35 million dollarni tashkil etadi.
Shunday qilib, loyihaning 5-bosqichi hisobga olinmagan holda, avvalgi barcha bosqichlar uchun Saudiya taraqqiyot jamg‘armasi tomonidan umumiy qiymati 75 million AQSh dollariga teng 57 ta umumta’lim maktabi qurilishi moliyalashtirildi.
Loyihalar Mo‘minobod, Xovaling, Baljuvon, Dang‘ara, Shamsiddini Shoxin, Vose, Farxor, Temurmalik, Hamadoniy, Xuroson, Jayxun, Vaxsh, Pyanj, Kabodiyon, Shahritus, Doʻsti, Jomiy, Devashtich, Asht, Maschox, Varzob, Rudakiy, Nurobod, shuningdek, Koʻlob, Boxtar, Nurek, Istaravshan, Penjikent, Konibodom, Vahdat shahar va tumanlarida umumta’lim maktablarini qurish va jihozlash orqali ta’lim sifatini oshirishga qaratilgan edi.
Saudiya taraqqiyot jamg‘armasi Tojikistonda o‘z faoliyatini 2002 yilda boshlagan. Jamg‘armaning sog‘liqni saqlash, ta’lim, irrigatsiya, transport va infratuzilmani rivojlantirish loyihalari va dasturlariga qo‘shgan hissasi 193 million dollarni tashkil etadi.
