Hurmatli Shadurdy Oveznepesovich, Bobur Masudovich, Filipp Igorevich,
Janobi Oliylari,
Davra suhbati ishtirokchilari,

Avvalo, bugungi tadbir tashabbusi va uning tashkil etilishiga qo‘shgan bebaho hissasi uchun Turkmaniston elchixonasiga va shaxsan Shadurdy Oveznepesovichga chuqur minnatdorlik bildiraman.

Bundan tashqari, BMTning Markaziy Osiyo bo‘yicha Preventiv diplomatiya mintaqaviy markazi rahbarining o‘rinbosarini, hurmatli elchilarni va "Xalqaro tinchlik va ishonch yili: Turkmanistonning global va mintaqaviy hamkorlikka qo‘shgan hissasi" mavzusidagi davra suhbati barcha ishtirokchilarini qutlashdan mamnunman. Bizning forumimiz Turkmaniston yetakchiligi tomonidan ilgari surilgan va BMT Bosh Assambleyasi tomonidan qo‘llab-quvvatlangan ushbu global tashabbusni amalga oshirishga bag‘ishlangan.

Shuningdek, O‘zbekiston-Turkmaniston strategik sherikligini rivojlantirishdagi yuqori darajadagi hamkorlikni ta’kidlab o‘tmoqchiman. Bu jarayonda mamlakatlarimiz rahbarlari o‘rtasidagi ishonchga asoslangan munosabatlar muhim o‘rin tutmoqda. Ikki tomonlama munosabatlarning asosiy jihatlaridan biri – xalqaro maydonda o‘zaro tashabbuslarni qo‘llab-quvvatlash hamda Markaziy Osiyoda mintaqaviy hamkorlikni mustahkamlashga qaratilgan hamkorlikdir.

O‘tgan yil oktyabr oyida, Ashxobodda Maxtumquli tavalludining 300 yilligiga bag‘ishlangan yuksak darajadagi xalqaro forumda O‘zbekiston Prezidenti Shavkat Mirziyoyev BMT Bosh Assambleyasi tomonidan 2025 yilning Xalqaro tinchlik va ishonch yili deb e’lon qilinishini olqishladi hamda Turkmanistonning noyob global muloqot platformasini ishga tushirish tashabbusini qo‘llab-quvvatladi.

O‘zbekistonda 2025 - yil dekabr oyida Ashxobodda bo‘lib o‘tadigan va Turkmanistonning ijobiy betaraflik siyosatining 30 yilligiga bag‘ishlangan xalqaro sammit global kun tartibidagi muhim voqealardan biri bo‘lishiga ishonch bildirildi. Prezident Mirziyoyev ta’kidlaganidek, O‘zbekiston "turkman birodarlarimizga zarur barcha yordamni ko‘rsatishga tayyor."

Xalqaro tinchlik va ishonch yilini e’lon qilish tashabbusi Ashxobodning global barqarorlik va muloqotni mustahkamlash borasidagi faol va konstruktiv rolini yana bir bor tasdiqlaydi. BMT Bosh Assambleyasi rezolyutsiyasini O‘zbekiston hamda yana 86 davlat qo‘llab-quvvatlagani mamlakatlarimizning tinchlik, ishonch va xalqaro hamkorlikka bo‘lgan mushtarak intilishini tasdiqlaydi.

Shu munosabat bilan, davra suhbati birinchi sessiyasida tinchlik va ishonchni mustahkamlash masalalariga e’tibor qaratish, shuningdek, Turkmanistonning global barqarorlik va hamkorlikka qo‘shgan beqiyos hissasini baholash taklif etiladi.

Bundan tashqari, Turkmanistonning Markaziy Osiyoda tinchlik, ishonch va mintaqaviy hamkorlikni rivojlantirishdagi muhim o‘rnini alohida ta’kidlash lozim. Ushbu fidokorlikning yorqin namunalaridan biri – 2022 yil iyul oyida qabul qilingan "Markaziy Osiyoda tinchlik, ishonch va hamkorlik hududi" nomli BMT Bosh Assambleyasi rezolyutsiyasidir.

Ushbu muhim hujjat Markaziy Osiyo davlatlari rahbarlarining Maslahat uchrashuvlarini muntazam o‘tkazish tashabbusini qo‘llab-quvvatlash zarurligini ta’kidlaydi. Ushbu uchrashuvlar mintaqaviy hamkorlikning samarali mexanizmiga aylandi. Shuningdek, hujjat mintaqa mamlakatlarining tinchlikni mustahkamlash, ishonchni oshirish va keng qamrovli hamkorlikni rivojlantirishga bo‘lgan intilishlarini aks ettiradi.

Shu munosabat bilan, davra suhbatining ikkinchi sessiyasida Markaziy Osiyodagi mintaqaviy hamkorlik masalalariga e’tibor qaratish rejalashtirilgan.

O‘zbekiston va Turkmaniston mintaqaviy kun tartibining muhim masalalari bo‘yicha faol hamkorlik qilmoqda. Bunga yaqqol misol sifatida joriy yil yanvar oyida mamlakatimizga Turkmaniston Vazirlar Mahkamasi Raisining o‘rinbosari, tashqi ishlar vaziri Rashid Ovezgeldiyevich Meredovning tashrifi bo‘ldi. O‘zbekiston rahbariyati tomonidan iliq kutib olingan mehmon O‘zbekiston-Turkmaniston siyosiy maslahatlashuvlarining navbatdagi raundini o‘tkazdi.

Bo‘lib o‘tgan fikr almashuvlar davomida oliy darajadagi tashriflarga tayyorgarlik ko‘rish, mintaqa davlatlari rahbarlarining Konsultativ uchrashuvi hamda "Markaziy Osiyo plyus" formatidagi sammitlarga alohida e’tibor qaratildi.

Ma’lumki, mintaqa davlatlari rahbarlarining navbatdagi Konsultativ uchrashuvi joriy yilda O‘zbekistonda bo‘lib o‘tadi. Shuningdek, Samarqandda "Markaziy Osiyo – Yevropa Ittifoqi" hamda "Markaziy Osiyo – Fors ko‘rfazi arab davlatlari hamkorlik kengashi" formatidagi sammitlar o‘tkazilishi rejalashtirilgan.

Biz mintaqaviy tashabbuslarimizni qo‘llab-quvvatlagani uchun turkman do‘stlarimizga minnatdorchilik bildiramiz. Ushbu hamkorlikdagi muhim bosqichlardan biri sifatida 2019 yil noyabr oyida Turkmaniston xalqining milliy yetakchisi, hurmatli Gurbanguli Berdimuhamedovning Markaziy Osiyo davlatlari rahbarlarining Konsultativ uchrashuvida ishtirok etish uchun O‘zbekistonga tarixiy tashrifini qayd etish lozim.

Shuni alohida ta’kidlash joizki, mintaqamiz davlatlari nafaqat siyosiy irodani namoyon etmoqda, balki tinchlik va ishonchni mustahkamlash, mintaqaviy hamkorlikni rivojlantirish yo‘lida amaliy hissa qo‘shmoqda. Bizning birgalikdagi sa’y-harakatlarimiz butun mintaqaning barqaror, tinch va farovon kelajagi uchun mustahkam poydevor yaratmoqda.

So‘z yakunida, Turkmaniston elchixonasiga samimiy minnatdorchilik bildirmoqchiman. O‘tgan yili elchixona MOXI uchun ishonchli hamkorlardan biriga aylandi. Shuningdek, O‘zbekiston Madaniyat vazirligi huzuridagi Millatlararo munosabatlar va xorijiy davlatlar bilan do‘stlik aloqalari qo‘mitasiga ham chuqur minnatdorchiligimni bildiraman. Xususan, o‘tgan yil oktabr oyida buyuk turkman shoiri va mutafakkiri Maxtumquli Firog‘iy tavalludining 300 yilligiga bag‘ishlangan "Maxtumquli Firog‘iy adabiy va siyosiy-falsafiy merosi" mavzusidagi ilmiy simpoziumni birgalikda tashkil etdik.

Sizlarga samarali fikr almashish tilab qolaman va ishonchim komilki, ushbu "davra suhbati" natijalari umumiy kelajagimiz – Markaziy Osiyoda tinchlik, ishonch va farovonlik yo‘lida hamkorlikni yanada rivojlantirishga xizmat qiladi.

E'tiboringiz uchun rahmat!