Suhbat avvalida J.Xenik MOXI rahbariyati bilan birinchi uchrashuvi ekanligini hisobga olib, institutga tashrif buyurish taklifi uchun minnatdorlik bildirdi. Diplomat institutning ilmiy-tadqiqot faoliyati, shuningdek, 2024-yilga mo‘ljallangan xalqaro tadbirlar jadvali bilan tanishdi.
Tomonlar ikki tomonlama o‘zaro manfaatli hamkorlikning bugungi holati va istiqbollarini, mintaqaviy va xalqaro ahamiyatga molik dolzarb masalalarni, shuningdek, “C5+1” formati doirasida Markaziy Osiyodagi jarayonlarni muhokama qildilar.
O‘tgan yili Nyu-Yorkda bo‘lib o‘tgan “C5+1” davlat rahbarlarining birinchi tarixiy sammiti yakunlari alohida qayd etildi. Elchining soʻzlariga koʻra, ushbu platforma oʻzaro hurmat va ishonchga asoslangan barqaror hamkorlikning asosidir.
Shu nuqtai nazardan, “C5+1” formati Markaziy Osiyo davlatlari va AQShning xavfsizlikni mustahkamlash, iqtisodiy barqarorlikni oshirish, barqaror rivojlanishni qo‘llab-quvvatlash, iqlim o‘zgarishiga qarshi kurashish va butun mintaqada tinchlikni mustahkamlashga sodiqligini tasdiqlashi alohida ta’kidlandi.
Uchrashuv davomida J. Xenik, shuningdek, ikki mamlakatning "aql" markazlari darajasida aloqalarni saqlash zarurligini alohida ta'kidladi, shuningdek, AQShning yetakchi tahliliy institutlari, shu jumladan Atlantika kengashi, AQSh tinchlik instituti, Kaspiy siyosati markazi va Markaziy Osiyo ishlari bo'yicha Oksus jamiyati bilan to'g'ridan-to'g'ri aloqalarni o'rnatishda yordam berishga tayyorligini bildirdi.
