Suhbat boshida tomonlar O'zbekiston-Qozog'iston strategik sheriklik va ittifoqchilik munosabatlarining izchil rivojlanishini qayd etdilar. Ikki mamlakat o‘rtasidagi savdo-sarmoya, transport kommunikatsiyalari, sanoat kooperatsiyasi, chegaraoldi hududlaridagi o‘zaro hamkorlik sohalaridagi jadal hamkorlik yuqori va oliy darajadagi muntazam uchrashuvlarda o‘z ifodasini topmoqda. Davlat rahbarlari tomonidan ushbu yo'nalishda qo'yilgan asosiy maqsadlardan biri savdo aylanmasini 4,4 milliard dollardan 10 milliard dollargacha oshirishdir.
Shuningdek, uchrashuv davomida 2021-yil 2-dekabrda Astana shahrida imzolangan institutlararo hamkorlik shartnomasi doirasida ikki tomonlama va mintaqaviy rivojlanishning asosiy jihatlari bo'yicha qo'shma tadbirlarni o'tkazishda MOXI va QSTI o'rtasidagi hamkorlikning muhimligini ta'kidlandi.
Bundan tashqari, tomonlar Qozog‘istonda bo‘lib o‘tadigan VII Markaziy Osiyo ekspertlar forumi yuzasidan fikr almashdilar. Mazkur konferensiya 2018-yildan beri mintaqa davlatlarining yetakchi tahliliy institutlari tomonidan BMTning Markaziy Osiyo uchun Preventiv diplomatiya boʻyicha mintaqaviy markazi bilan hamkorlikda har yili oʻtkazib kelinadi.
Uchrashuv yakunida tahlil markazlari rahbarlari ilmiy hamkorlikni yanada chuqurlashtirishga, shuningdek, MOXI va QSTI oʻrtasida 2024-yilga moʻljallangan kompleks dasturni ishlab chiqish, jumladan, qoʻshma tadbirlar oʻtkazish, davra suhbatlari tashkil etish va tajriba almashishga tayyor ekanliklarini tasdiqladilar.
QSTI - Qozog'iston Respublikasi Prezidentining 1993 yil 16 iyundagi farmoniga muvofiq tashkil etilgan davlat tahliliy muassasasi. Institut Kavkaz, Markaziy va Janubiy Osiyodagi uchta yetakchi tahliliy markazlar qatoriga kiradi (58 ta markazdan). QSTI asosiy vazifasi Qozog'iston Respublikasi Prezidentining davlat ichki va tashqi siyosatining strategik yo'nalishlaridagi faoliyatini tahliliy, tadqiqot va ekspert materiallar bilan ta’minlash.