Uchrashuvda ekspertlar hamkorligining hozirgi holati va uni kengaytirish imkoniyatlari, shuningdek, Markaziy Osiyo bo‘yicha qo‘shma ilmiy va ta’lim faoliyatining yo‘nalishlari muhokama qilindi.
Javlon Vaxabov MOXI va MGIMO Xalqaro tadqiqotlar instituti o‘rtasidagi muloqotni ikki tuzilma hamkorligini chuqurlashtirishga qaratilgan aniq, amaliy tashabbuslar bilan boyitish muhimligini ta’kidladi. Ekspertlar hamjamiyatlari o‘rtasidagi muntazam ikki tomonlama aloqalar hamkorlikni rivojlantirishga doir amaliy yondashuvlarni ishlab chiqish hamda ikki tomonlama munosabatlar va mintaqaviy taraqqiyotning dolzarb masalalari bo‘yicha umumiy tadqiqot kun tartibini shakllantirishga xizmat qiladi.
Maksim Suchkov Markaziy Osiyo tahlil markazlari, xususan, MOXI bilan aloqalarni rivojlantirishdan manfaatdor ekanini bildirdi. U qo‘shma ilmiy va tahliliy materiallar tayyorlash, ekspertlar tadbirlari va vebinarlar o‘tkazish, shuningdek, yosh tadqiqotchilar o‘rtasidagi hamkorlikni rivojlantirishni mumkin bo‘lgan hamkorlik yo‘nalishlari sifatida qayd etdi.
Uchrashuv yakunida tomonlar hamkorlikni kengaytirish va ekspertlar almashinuvini davom ettirishga tayyorligini tasdiqladi.
MGIMO Xalqaro tadqiqotlar instituti universitetning yetakchi ilmiy-tadqiqot va ekspert-tahliliy bo‘linmasi bo‘lib, Rossiyaning tashqi siyosat va global xavfsizlik masalalari bo‘yicha asosiy tahlil markazlaridan biri hisoblanadi.
2021-yil 15-iyulda MOXI va MGIMO o‘rtasida Hamkorlik to‘g‘risidagi memorandum imzolangan.
