Tadbirda Yaponiya Tashqi ishlar vazirligi, Yaponiya xalqaro munosabatlar instituti, "Japan Foundation," "Sasakawa Peace Foundation" vakillari, shuningdek, Yaponiyaning Markaziy Osiyo bo‘yicha yetakchi ekspertlari ishtirok etdi.
Davra suhbati avvalida ishtirokchilar Markaziy Osiyo va Yaponiya o‘rtasidagi hamkorlikni rivojlantirishning zamonaviy tendensiyalarini muhokama qilib, 2025-yil dekabr oyida bo‘lib o‘tgan ushbu formatdagi birinchi sammit mintaqaviy sheriklikni rivojlantirishda muhim bosqich bo‘lganini ta’kidladilar.
Yetakchilar uchrashuvi o‘zaro bog‘liqlik, barqaror iqtisodiy rivojlanish, innovatsiyalar va gumanitar almashinuv sohalarida hamkorlikni chuqurlashtirishdan ikki tomon ham manfaatdor ekanini tasdiqlab, kelgusidagi hamkorlikning strategik yo‘nalishlarini belgilab bergani ta’kidlandi.
Muhokama chog‘ida ekspertlar Markaziy Osiyo davlatlari rahbarlarining izchil sa’y-harakatlari tufayli mintaqa yagona siyosiy, iqtisodiy va gumanitar makon sifatida tobora mustahkam qaror topayotganini ta’kidladilar.
Ishtirokchilar Yaponiyaning tashqi siyosiy va tashqi iqtisodiy ustuvorliklari tizimida Markaziy Osiyo tobora muhim ahamiyat kasb etayotganini ta’kidladilar. Sun’iy intellekt, inson kapitalini rivojlantirish va mehnat resurslari sohasidagi hamkorlikni kengaytirish hamkorlikning istiqbolli yo‘nalishlari sifatida qayd etildi.
Uzoq muddatli hamkorlik odamlar o‘rtasidagi aloqalarni faol rivojlantirishga asoslanishi kerakligi ta’kidlandi. Ishtirokchilarning fikricha, yoshlar, ta’lim va madaniy almashinuvlarni kengaytirish o‘zaro anglashuvni mustahkamlashga va kelgusidagi hamkorlik uchun barqaror asos yaratishga xizmat qiladi.
Ishtirokchilar, shuningdek, hamkorlikni yanada rivojlantirish nafaqat akademik hamjamiyatning yaqin hamkorligini, balki bu jarayonga davlat tuzilmalari va ishbilarmon doiralar vakillarini jalb qilishni ham talab qilishini ta’kidladilar.
Shu munosabat bilan xalqaro ekspert va akademik hamjamiyat tomonidan talab qilinadigan yangi bilimlarni yaratishga qaratilgan barqaror ekspert aloqalarini o‘rnatish va qo‘shma tadqiqotlar o‘tkazish muhimligi ta’kidlandi.
Uchrashuvni sarhisob qilar ekan, ishtirokchilar Markaziy Osiyo va Yaponiya o‘rtasidagi ekspert hamkorligi uchun yuqori salohiyat mavjudligini tasdiqladilar. Toshkent shahrida bo‘lib o‘tadigan "Markaziy Osiyo - Yaponiya" tahliliy markazlari forumi mintaqa mamlakatlari va Yaponiya o‘rtasidagi hamkorlikni yanada rivojlantirish bo‘yicha amaliy tavsiyalar tayyorlash uchun muhim maydon bo‘lishi ta’kidlandi.
Tokio universiteti Yaponiyaning eng qadimgi va eng nufuzli milliy tadqiqot universiteti bo‘lib, 1877-yilda tashkil etilgan. Universitet milliy reytinglarda birinchi o‘rinni egallaydi va dunyoning yetakchi universitetlari qatoriga kiradi, uning bitiruvchilari va xodimlari orasida 20 nafar Nobel mukofoti sovrindorlari hamda Yaponiyaning davlat va siyosat arboblarining katta qismi bor.
