Ko‘rgazmaning ochilish marosimida Tojikiston Sanoat va yangi texnologiyalar vazirligi, O‘zbekistonning Tojikistondagi elchixonasi va “O‘zsanoatqurilishmateriallari” uyushmasi vakillari ishtirok etishdi. Mehmonlar inshootlarni ko‘zdan kechirib, mahsulotlar turi va taklif etilayotgan narxlarni o‘rgandilar.

Tadbir doirasida “biznesdan biznesga” (B2B) formatida uchrashuvlar o‘tkazilib, o‘zbek mahsulotlarining asosiy bozoriga aylangan Tojikistonda o‘zbek qurilish materiallariga talab ortib borayotgani ta’kidlandi.
O‘zbekiston qurilish materiallari tashqi iqtisodiy aloqalar boshqarmasi boshlig‘i Mehroj Botirovning aytishicha, Tojikiston o‘zbek qurilish materiallari eksporti bo‘yicha ikkinchi o‘rinda turadi.

“2024-yilda Tojikistonga 115 million dollarlik qurilish materiallari, jumladan, metall buyumlar, quruq qurilish aralashmalari, sement, keramika, PVX profillar, quvurlar, plastmassa buyumlar, DSP, MDF panellari va qurilish oynalari eksport qilindi”, — ta’kidladi Botirov.

Yangi tashkil etilgan savdo uyi sifatli mahsulotlarga talab yuqori bo‘lgan Dushanbe shahrida jadal rivojlanayotgan qurilish sohasi ehtiyojlarini qondiradigan toshdan tortib PVX panellargacha bo‘lgan keng turdagi qurilish materiallarini taklif etadi.

Kelgusida “O‘zsanoatqurilishmateriallari” uyushmasi 2025-yilda eksport hajmini ikki baravar oshirishni, shuningdek, Tojikistonning So‘g‘d va Tog‘li Badaxshon viloyatlarida qo‘shimcha savdo uylarini ochishni rejalashtirmoqda. Gazbeton bloklari, issiqlik izolyatsion panellari, tabiiy toshlar, devor qog‘ozi kabi mahsulotlar eksportini kengaytirish bo‘yicha ham muzokaralar olib borilmoqda.

Batafsil: https://khovar.tj/rus/2025/01/v-dushanbe-otkrylsya-torgovyj-dom-uzbekistana-spetsializiruyushhijsya-na-stroitelnyh-materialah/