Tadbir davomida sammitning asosiy natijalari, Markaziy Osiyo davlatlari rahbarlari tomonidan ilgari surilgan tashabbus va kelishuvlarni birgalikda amalga oshirish masalalari muhokama qilinishi rejalashtirilgan.

Ishtirokchilar - O‘zbekistonda akkreditatsiyadan o‘tgan diplomatik korpus rahbarlari, mamlakatning yetakchi tahlil markazlari, vazirlik va idoralari, ishbilarmon doiralar vakillari, ekspertlar va jurnalistlar.

Davra suhbatida O‘zbekiston Prezidenti Sh.M.Mirziyoyev tomonidan iqtisodiyot, sanoat, energetika, logistika, ekologiya va suv xo‘jaligi sohalarida ilgari surilgan tashabbuslarni amalga oshirish, shuningdek, Ozarbayjonning Markaziy Osiyo davlatlari rahbarlarining Maslahat uchrashuvlari formatining to‘laqonli ishtirokchisi sifatida qo‘shilishiga alohida e’tibor qaratilishi kutilmoqda.

O‘zbekiston Prezidenti Shavkat Mirziyoyevning Maslahat uchrashuvi arafasida e’lon qilingan "Markaziy Osiyo yangi davr ostonasida" nomli maqolasining mazmun-mohiyati yuzasidan fikr almashish rejalashtirilgan.

Forumda O‘zbekiston Respublikasi Prezidentining tashqi siyosat masalalari bo‘yicha maslahatchisi A.X.Kamilov nutq so‘zlashi ko‘zda tutilgan.

Bundan tashqari, Ozarbayjon, Qozog‘iston, Qirg‘iziston, Tojikiston va Turkmaniston diplomatik missiyalari rahbarlarining nutqlari hamda diplomatik korpus vakillari va ekspertlar ishtirokidagi muhokama sessiyasi kutilmoqda.