Suhbat davomida tomonlar MOXI va ODI Global o‘rtasidagi hamkorlikni yanada rivojlantirish masalalarini muhokama qildilar. Birgalikdagi tadqiqotlarni amalga oshirish, ekspertlar almashinuvini kengaytirish hamda Forum yakunlari bo‘yicha amaliy tashabbuslarni hayotga tatbiq etishga alohida e’tibor qaratildi.

J. Vaxabov bo‘lib o‘tgan Forum Markaziy Osiyo va Buyuk Britaniya o‘rtasidagi hamkorlikni rivojlantirish bo‘yicha aniq takliflarni ishlab chiqishga yo‘naltirilgan barqaror ekspertlar muloqoti uchun boshlang‘ich nuqta bo‘lishi lozimligini ta’kidladi.

R. Nadin Markaziy Osiyo va Buyuk Britaniya ekspertlari o‘rtasidagi bevosita va muntazam fikr almashinuvi mintaqada kechayotgan jarayonlarni chuqurroq anglash hamda yuqori va oliy darajalarda hamkorlikning yanada mazmunli kun tartibini shakllantirish imkonini berishini qayd etdi.

Xususan, tomonlar Forum natijalarini Buyuk Britaniyaning tegishli davlat idoralari, parlament a’zolari, moliya institutlari va ishbilarmon doiralari orasida ilgari surish mexanizmlarini muhokama qildilar.

Uchrashuv yakunlari bo‘yicha muntazam ishchi aloqalarni davom ettirish hamda Forum doirasida ilgari surilgan g‘oya va takliflarni amaliy jihatdan amalga oshirishga birgalikda ko‘maklashish bo‘yicha kelishuvga erishildi.