Uchrashuv davomida O‘zbekiston va Yevropa Ittifoqi o‘rtasidagi hamkorlikning joriy holati hamda uni ham ikki tomonlama asosda, hamda “Markaziy Osiyo – Yevropa Ittifoqi” formati doirasida yanada chuqurlashtirish istiqbollari muhokama qilindi. Shuningdek, ikki mintaqa tahliliy markazlari o‘rtasidagi hamkorlikni faollashtirish masalalariga alohida e’tibor qaratildi.
Xususan, Samuel Vesterbay so‘nggi paytlarda O‘zbekiston va Yevropa Ittifoqi o‘rtasidagi munosabatlar sezilarli darajada faollashgani va sifat jihatidan yangi bosqichga ko‘tarilganligini ta’kidladi. Uning so‘zlariga ko‘ra, O‘zbekiston Respublikasi Prezidenti Shavkat Mirziyoyevning yaqinda Bryusselga amalga oshirgan tashriflari hamda Kengaytirilgan sheriklik va hamkorlik to‘g‘risidagi bitimning imzolanishi Toshkent va Bryussel o‘rtasidagi uzoq muddatli strategik hamkorlik uchun yangilangan va yanada keng qamrovli asos yaratdi.
Bundan tashqari, “Markaziy Osiyo – Yevropa Ittifoqi” formati doirasida ko‘p tomonlama hamkorlik faol rivojlanayotgani qayd etildi. YQK boshqaruvchi direktori ta’kidlashicha, joriy yilning aprel oyida Samarqand shahrida bo‘lib o‘tgan “Markaziy Osiyo – Yevropa Ittifoqi” sammiti mintaqalararo muloqotni institutsionallashtirish yo‘lidagi muhim bosqich bo‘lib, ikki mintaqa o‘rtasidagi siyosiy, iqtisodiy va ekspertlar hamkorligini chuqurlashtirishga qo‘shimcha turtki berdi.
O‘z navbatida, Javlon Vaxabov bugungi kunda Markaziy Osiyo va Yevropa Ittifoqi o‘rtasida ko‘p darajali va institutsional jihatdan puxta shakllangan hamkorlik yo‘lga qo‘yilganligini qayd etdi. Uning ta’kidlashicha, bu holat oliy darajadagi muloqotning rivojlanishi, parlamentlararo aloqalarning mustahkamlanishi, sohaviy vazirlar uchrashuvlarining muntazam o‘tkazilishi, shuningdek, joriy yildan boshlab ikki mintaqa tahliliy muassasalari o‘rtasida tizimli hamkorlik yo‘lga qo‘yilganligi orqali namoyon bo‘lmoqda.
Shu munosabat bilan MOXI va YQK rahbarlari tahliliy markazlar o‘rtasidagi institutsional hamkorlikni yanada chuqurlashtirishga kelishib oldilar. Xususan, tomonlar 2026-yilga mo‘ljallangan rejalarni muhokama qilib, yetakchi Yevropa nashrlari uchun qo‘shma tahliliy maqolalar tayyorlash, MOXI ilmiy xodimlarining malakasini oshirishga qaratilgan seminarlar va ta’lim kurslarini tashkil etish, shuningdek, “Markaziy Osiyo – Yevropa Ittifoqi” tahliliy markazlar forumi doirasida muntazam muloqotni davom ettirish bo‘yicha kelishib oldilar.
Yevropa Qo‘shnichilik Kengashi — Yevropa Ittifoqining tahliliy muassasasi bo‘lib, uning faoliyati Yevropa Ittifoqining qo‘shni va hamkor davlatlari, jumladan Markaziy Osiyo mamlakatlari bilan siyosiy muloqot, iqtisodiy hamkorlik va ekspertlik aloqalarini rivojlantirishga qaratilgan. Kengash ushbu maqsadlarga tahliliy qo‘llab-quvvatlash, siyosiy tavsiyalar ishlab chiqish hamda qo‘shma tashabbuslarni ilgari surish orqali erishadi.
