Tashrif davomida delegatsiya Yevropa Kengashi Prezidenti ofisi rahbari Pedro Lurti, Yevropa Ittifoqining tashqi ishlar va xavfsizlik siyosati bo‘yicha Oliy vakili devoni rahbari Vivian Lunela hamda Yevropa Ittifoqining terrorizmga qarshi kurash koordinatori Bartyan Vegter bilan uchrashdi.
Shuningdek, delegatsiya tarkibiga Markaziy Osiyo Xalqaro Instituti direktori Javlon Vahabov ham kiritildi.
Lurti bilan bo‘lib o‘tgan muzokaralarda 3–4 aprel kunlari Samarqandda bo‘lib o‘tadigan Markaziy Osiyo – Yevropa Ittifoqi sammiti doirasida mintaqalararo hamkorlikni chuqurlashtirish masalalari muhokama qilindi. Yevropa Kengashi vakili mazkur sammit mintaqaviy hamkorlikni mustahkamlashda muhim bosqich bo‘lishiga ishonch bildirdi hamda siyosat va xavfsizlik, savdo va investitsiyalar, energetik sheriklik, transport bog‘liqligi, ta’lim va madaniy almashinuv kabi ustuvor yo‘nalishlarda hamkorlikni kengaytirish uchun muhim platforma bo‘lishini ta’kidladi.
Tomonlar shuningdek, 2022-yilda Ostona va 2023-yilda Cholpon-Otada bo‘lib o‘tgan Markaziy Osiyo – Yevropa Ittifoqi uchrashuvlarining ahamiyatini qayd etib, ularning barqaror muloqotni rivojlantirish va strategik sheriklikni mustahkamlashdagi rolini ta’kidladilar.
Lunela bilan bo‘lib o‘tgan uchrashuvda 2019-yilgi Yevropa Ittifoqining Markaziy Osiyo bo‘yicha Strategiyasini amalga oshirish jarayoni muhokama qilindi. Strategiyani zamonaviy sharoitlarga moslashtirish zarurligi qayd etildi. Asosiy mavzular qatorida iqtisodiy aloqalarni kengaytirish, barqaror rivojlanish maqsadlarini ilgari surish va mintaqaviy xavfsizlikni mustahkamlash masalalari alohida e’tiborga olindi. Muzokaralar chog‘ida transport bog‘liqligini rivojlantirish, xususan, Markaziy Osiyo va Yevropani bog‘lovchi Trans-Kaspiy transport yo‘lagi muhokama qilindi. Mazkur yo‘lak savdo, investitsiya va raqamli aloqalarni mustahkamlash bilan birga mintaqaviy iqtisodiy integratsiyani ham kuchaytirishga xizmat qilishi ta’kidlandi.
Vegter bilan bo‘lib o‘tgan uchrashuvda Yevropa Ittifoqining terrorizmga qarshi kurash bo‘yicha koordinatori 2023-yilda Markaziy Osiyo Xalqaro Institutida o‘tkazilgan Markaziy Osiyo – Yevropa Ittifoqi xavfsizlik konferensiyasining amaliy ahamiyatini alohida qayd etdi. U samarali terrorizmga qarshi kurash mintaqaviy va xalqaro darajada yaqin hamkorlikni talab qilishini ta’kidladi. Bunday platformalar Yevropa va Markaziy Osiyo o‘rtasida tajriba almashish, xavfsizlik mexanizmlarini muvofiqlashtirish va o‘zaro qo‘llab-quvvatlash imkoniyatini taqdim etishini qayd etdi.
Uchrashuvlar yakunida yaqinlashib kelayotgan Samarqand sammitining kun tartibini shakllantirish bo‘yicha aniq takliflar ilgari surildi. Ular mintaqalararo hamkorlikni kengaytirish, infratuzilmani rivojlantirish, savdo-iqtisodiy aloqalarni chuqurlashtirish hamda xavfsizlik va global tahdidlarga qarshi kurash bo‘yicha hamkorlikni mustahkamlashga qaratilgan.
