Uchrashuv davomida Markaz rahbarining o‘rinbosari Filipp Saprikin bilan Markaziy Osiyo mamlakatlari o‘rtasidagi hamkorlikni mustahkamlash, shuningdek, O‘zbekiston va Turkmanistonning mintaqaviy hamkorlikni chuqurlashtirishdagi o‘rni yuzasidan fikr almashildi.

J.Vaxabov Markaziy Osiyoda tinchlik, ishonch va hamkorlikni mustahkamlash, mintaqa davlatlari o‘rtasidagi muloqot va hamkorlikni rivojlantirish, shuningdek, O‘zbekistonning tegishli idoralari bilan yaqin sheriklikni yo‘lga qo‘yish borasidagi doimiy va samarali faoliyati uchun Mintaqaviy markazga minnatdorlik bildirdi. MOXI direktori O‘zbekiston tomoni Markazning preventiv diplomatiya va o‘zaro anglashuv kun tartibini ilgari surishga qo‘shgan hissasini yuqori baholashini ta’kidladi.

Saprikin Markaziy Osiyo davlatlari tomonidan davlatlararo hamkorlikni mustahkamlash yo‘lida erishilgan ijobiy natijalarni qayd etib, mintaqa mamlakatlari tomonidan asosiy sohalarda integratsiya jarayonlarini ilgari surish bo‘yicha amalga oshirilayotgan chora-tadbirlarni Mintaqaviy markaz to‘liq qo‘llab-quvvatlashini bildirdi.

Saprikin, shuningdek, Turkmanistonning tinchlik va ishonchni mustahkamlashga qaratilgan konstruktiv siyosatini alohida ta’kidlab, O‘zbekistonning qo‘shnichilik munosabatlarini rivojlantirish yo‘lidagi siyosatini yuqori baholab, uni Markaziy Osiyoda barqarorlik va izchil rivojlanishni ta’minlashdagi muhim omil sifatida e’tirof etdi.