Uchrashuvda davlat organlari va parlamentlar vakillari, sobiq davlat va xalqaro tashkilotlar rahbarlari, YI delegatsiyalari, diplomatik korpus, shuningdek Markaziy Osiyo va Janubiy Kavkaz mamlakatlarining yetakchi tahliliy markazlari va akademik doiralari ishtirok etmoqda.
Tadbir Prezident Shavkat Mirziyoyevning tabrigi bilan boshlandi; murojaatni tashqi siyosat bo‘yicha maslahatchi Abdulaziz Komilov o‘qib eshittirdi. Unda Nizomiy Ganjaviy Xalqaro Markazining nufuzli muloqot maydonchasi sifatidagi o‘rni, Nizomiyning uyg‘unlik va adolat haqidagi g‘oyalari dolzarbligi, Markaziy Osiyo va Janubiy Kavkaz o‘rtasidagi o‘zaro bog‘liqlikni hamda Yevropa bilan hamkorlikni chuqurlashtirish ustuvor yo‘nalishlari qayd etildi.
Yevropa Ittifoqi bilan munosabatlarning yangi bosqichi, “Markaziy Osiyo – Yevropa Ittifoqi” sammiti qarorlarini amaliy mazmun bilan to‘ldirish, transport-logistika va energetika yo‘laklarini rivojlantirish masalalariga alohida e’tibor qaratildi. Bu jarayonlar mintaqaning G‘arb va Sharq o‘rtasidagi asosiy bog‘lovchi halqa sifatidagi rolini mustahkamlamoqda.
O‘zbekiston–Ozarboyjon munosabatlaridagi ijobiy dinamikalar alohida ta’kidlandi. Ozarboyjonning Markaziy Osiyo va Yevropani bog‘lovchi strategik “ko‘prik” sifatidagi funktsiyasi hamda Janubiy Kavkaz–Markaziy Osiyo o‘zaro hamkorligini kuchaytirish borasidagi sa’y-harakatlari e’tirof etildi.
O‘z nutqida MOXI direktori Javlon Vaxabov O‘rta koridor (Transkaspiy xalqaro transport yo‘lagi)ning Xitoy, Markaziy Osiyo va Yevropani ishonchli bog‘laydigan muhim transport-logistika arteriyasiga aylanayotganini ta’kidladi. Uning qayd etishicha, ushbu yo‘lak marshrutni qariyb 2 500 kilometrga qisqartiradi va yetkazib berishni 15–20 kunda ta’minlaydi, bu esa an’anaviy yo‘nalishlar izdan chiqqan sharoitda eng samarali variantga aylanmoqda.
Javlon Vaxabov Ozarboyjon va Armaniston o‘rtasida barqaror tinchlik o‘rnatilishi koridor ahamiyatini yanada oshirishini, Zangazur uchastkasi hamda Xitoy–Qirg‘iziston–O‘zbekiston temir yo‘li (KKO) esa Sharq–G‘arb bo‘ylab barqaror infratuzilmaning strategik bo‘g‘inlari bo‘lishini qayd etdi.
U, shuningdek, O‘rta koridorga Osiyo, Yaqin Sharq va Yevropadagi mamlakatlar katta qiziqish bildirayotganini, uni mintaqalararo aloqalarni mustahkamlashning muhim vositasi sifatida ko‘rayotganini bildirdi. Xususan, YI Samarqand sammitida mintaqa bilan barqaror transport bog‘liqligini qo‘llab-quvvatlaganini tasdiqladi va transport yo‘laklarini rivojlantirishni o‘z ichiga olgan €12 mlrd hajmdagi investitsiya paketini e’lon qildi.
Yakunida Javlon Vaxabov O‘rta koridorni dinamik rivojlantirish muvofiqlashtirilgan sa’y-harakatlarni talab etishini ta’kidladi: infratuzilma loyihalarini YIning Global Gateway tashabbusi bilan uyg‘unlashtirish, tranzit qoidalari va tariflarini uyg‘unlashtirish, moslashuvchan investitsiyalarni safarbar etish (yiliga $40 mlrd gacha, KKO loyihasida YEIB va YEBRD ishtirokini ham qamrab olgan holda) hamda Yevropa institutlari ko‘magida logistika raqamlashtirishini jadallashtirish zarur.
