Tadbir CPC — Kaspiy mintaqasida siyosat, energetika va iqtisodiyot masalalari bo‘yicha mustaqil va notijorat tahlil markazi tomonidan tashkil etildi.
CPC boshqaruvi raisi uchrashuvni ochib, mintaqada kuchayib borayotgan o‘zaro bog‘liqlik sharoitida Markaziy Osiyo bilan barqaror va uzoq muddatli muloqotni yo‘lga qo‘yish muhimligini ta’kidladi.
Suhbat chog‘ida mintaqaviy integratsiya, transport va energetik bog‘liqlik, savdo va investitsiyalarni rivojlantirish kabi dolzarb mavzular yuzasidan fikr almashildi.
Javlon Vahabov o‘z nutqida Markaziy Osiyo bugun sifat jihatdan yangilanish va tub o‘zgarishlar bosqichini boshdan kechirayotganini ta’kidladi. So‘nggi yillarda mintaqaviy savdo hajmi bir necha baravarga oshgani, siyosiy muloqot esa tizimli tus olgani alohida qayd etildi.
Shuningdek, Markaziy Osiyo davlatlari rahbarlarining yillik maslahat uchrashuvlari va o‘tgan yili Ostona sammitida qabul qilingan "Markaziy Osiyo – 2040" strategiyasi mintaqaning barqaror va yagona istiqbolini shakllantirishga qaratilgani bilan e’tirof etildi.
Uchrashuvda CPC ilmiy xodimi doktor Erik Rudenshoyld ham ishtirok etdi va mintaqadagi o‘zgarishlar sur’ati va ularning istiqboldagi oqibatlari bo‘yicha fikr bildirdi.
Muhokamalarning muhim qismi O‘zbekistondagi kritik qazilmalar loyihalariga bag‘ishlandi. Mamlakatda bir qator yirik loyihalar amalga oshirilayotgani va xorijiy hamkorlarning ularga bo‘lgan qiziqishi ortib borayotgani ta’kidlandi. AQSh tomoni barqaror yer osti resurslarini boshqarish bo‘yicha texnik tajriba almashishga tayyor ekanligini bildirdi.
Transport-logistika masalalari borasida qatnashuvchilar Transkaspiy yo‘lagi tobora ommalashib borayotganini qayd etdilar. Tarif siyosatini muvofiqlashtirish va raqamli yechimlarni faol joriy etish ushbu yo’l samaradorligini oshirishda muhim omillar sifatida ko‘rsatildi.
Uchrashuv yakunida AQSh va O‘zbekiston ekspert doiralari o‘rtasida tadqiqotchilar bilan hamkorlikni yanada chuqurlashtirish, barqaror taraqqiyot va mintaqaviy anglashuvni kuchaytirishga qaratilgan qo‘shma tashabbuslarni ilgari surish bo‘yicha o‘zaro qiziqish bildirildi.
