Uchrashuv davomida ikki muassasa o‘rtasida akademik va ekspertlik hamkorligini rivojlantirish imkoniyatlari, jumladan, qo‘shma tadqiqot loyihalarini amalga oshirish, mutaxassislar almashinuvi va siyosiy muloqot uchun tematik platformalar yaratish masalalari muhokama qilindi.

Muhammad Baharun tahlil markazlari mintaqaviy anglashuv va barqarorlikni mustahkamlashda muhim o’rin egallashini, ayniqsa Birlashgan Arab Amirliklarining Markaziy Osiyo mamlakatlari bilan aloqalarni kengaytirishga qiziqishi ortib borayotganini ta’kidladi.

Ta’kidlandiki, bugungi kunda BAA o‘z iqtisodiyotini diversifikatsiya qilish va mintaqaviy hamkorlikni mustahkamlash maqsadida Markaziy Osiyo, jumladan, O‘zbekistonga faol investitsiya kiritmoqda.

Tomonlar ilmiy tadqiqotlar, ekspertlar almashinuvi va siyosiy tahlil sohalarida qo‘shma tashabbuslarni ilgari surish orqali barqaror hamkorlikni rivojlantirishdan manfaatdor ekanliklarini bildirdilar.