Uchrashuvda MOXI direktori O‘zbekiston va Mongoliya uchun, dengizga chiqish imkoniyati yo‘q davlatlar sifatida, logistika va transport bog‘liqligini rivojlantirish strategik ahamiyat kasb etishini ta’kidladi. Har ikki mamlakat o‘xshash muammolarga duch kelmoqda: tashish xarajatlari va yetkazib berish muddati ortib bormoqda, logistika xarajatlarining import qiymatidagi ulushi (Markaziy Osiyo uchun 60% gacha) oshmoqda, shuningdek, yangi yo‘nalishlarni rivojlantirish va transport koridorlarini diversifikatsiya qilish zarurati dolzarb bo‘lib qolmoqda.

Shu nuqtai nazardan, tomonlar mintaqaviy infratuzilma tashabbuslari, jumladan, “Xitoy–Qirg‘iziston–O‘zbekiston” loyihasi va Transkaspiy transport koridorining imkoniyatlarini kengaytirish masalalarida fikr almashdilar. Markaziy Osiyo va Mongoliyaning geografik joylashuvi butun mintaqani Yevrosiyo uchun muhim tranzit va kommunikatsiya markaziga aylantirish uchun qo‘shimcha imkoniyatlar ochishini qayd etildi.

Alohida e’tibor, so‘nggi o‘ttiz yil ichida ilk bor bo‘lib o‘tgan Mongoliya Prezidenti tashrifining (2024 yil iyun) natijalariga qaratildi. Mazkur tashrif doirasida havo va avtomobil qatnovini rivojlantirish bo‘yicha hukumatlararo bitimlar imzolandi. Mongoliya vakillari erishilgan kelishuvlarni faol amalga oshirishga tayyor ekanini tasdiqlab, ikki tomonlama hamkorlikda transport bog‘liqligini rivojlantirish markaziy o‘ringa ega ekanini ta’kidladi.

Uchrashuv yakunida tomonlar institutlar o‘rtasidagi ekspertlik muloqotining, xususan, tahlil, strategik rejalashtirish va transport, iqtisodiyot hamda barqaror rivojlanish yo‘nalishida ilg‘or tajriba almashishning muhimligini alohida ta’kidladilar. Har ikki institut mintaqa uchun samarali yechimlar ishlab chiqish maqsadida aloqalarni davom ettirish va hamkorlikni yanada chuqurlashtirishga tayyor ekanini tasdiqladi.