Uchrashuv so‘nggi yillarda sezilarli rivojlanish ko‘rsatayotgan Mongoliya va O‘zbekiston o‘rtasidagi ko‘p qirrali muloqotning muhim bosqichiga aylandi. Tomonlar ikki tomonlama munosabatlardagi muhim voqealar, jumladan, 2024-yil yozida Toshkentda Mongoliya elchixonasining ochilishi va Mongoliya Prezidentining O‘zbekistonga tarixiy birinchi tashrifi kabi yutuqlarni ta’kidlab o‘tdi.
J.Vahabov O‘zbekiston va Mongoliyaning dengizga chiqish imkoniyatisiz joylashgani ulardan iqtisodiy hamkorlik, logistika va savdo sohalarida innovatsion yondashuvlarni talab qilishini qayd etdi. U ikki institut manfaatlarining mos kelishi birgalikdagi tashabbuslarni amalga oshirish uchun zamin yaratishini, bu esa ikki davlat ekspertlari o‘rtasida bilim va tajriba almashish platformasiga aylanishi mumkinligini ta’kidladi.
Muloqot davomida delegatsiyalar o‘z tadqiqot institutlari faoliyati haqida batafsil ma’lumot almashdilar. Mongoliya Milliy xavfsizlik kengashi huzuridagi Strategik tadqiqotlar instituti mintaqaviy va global tendensiyalar, xususan, Shimoliy-Sharqiy Osiyodagi xavfsizlik masalalari bo‘yicha strategik tahlil olib boradi. Har ikki tomon tadqiqot ustuvorliklarining mos kelishini qayd etib, ilmiy hamkorlik uchun qulay sharoitlar mavjudligini ta’kidladi.
Mende Jargalsaikan STI 2014-yilda tashkil etilgan Ulan-Bator muloqoti (UBM) xalqaro forumining tashkilotchilaridan biri ekanini qayd etdi. Ushbu forum har yili siyosatchilar, diplomatlar va ekspertlarni bir joyga jamlab, Shimoliy-Sharqiy Osiyo mamlakatlari o‘rtasida o‘zaro tushunishni yaxshilash va ishonchni mustahkamlashga qaratilgan.
Uchrashuv davomida O‘zbekiston va Mongoliya tomonidan savdo-iqtisodiy hamkorlik sohasidagi asosiy tashabbuslar muhokama qilindi. Tovar aylanmasini kengaytirish, logistika infratuzilmasini rivojlantirish va o‘zaro investitsiyalarni rag‘batlantirish bo‘yicha rejalar o‘rtaga tashlandi. Shuningdek, ekologik va iqlim muammolariga qaratilgan barqaror rivojlanishning ilg‘or tajribalarini birgalikda o‘rganish masalasi ham ko‘tarildi.
Mongoliya tomoni iqtisodiy integratsiya, o‘zaro bog‘liqlikni mustahkamlash va Markaziy Osiyo, xususan, O‘zbekiston bilan hamkorlikni rivojlantirish muhimligini ta’kidladi. Markaziy Osiyo davlatlari rahbarlarining Maslahat uchrashuvlari formati, xususan, 2025-yilda O‘zbekiston raisligida o‘tkazilishi rejalashtirilgan yettinchi uchrashuvga alohida qiziqish bildirildi.
Uchrashuv yakunida tomonlar birgalikdagi tashabbuslar va loyihalarni amalga oshirish orqali ikki tomonlama aloqalarni mustahkamlash niyatida ekanliklarini yana bir bor tasdiqladilar. Ular konferensiyalar, davra suhbatlari va seminarlar tashkil etish orqali institutlar o‘rtasidagi hamkorlikni chuqurlashtirish va ikki tomonlama, mintaqaviy hamda xalqaro darajadagi dolzarb masalalarni hal etish uchun yangi imkoniyatlar yaratishga xizmat qilishini ta’kidladilar.
