MOXI direktori Javlon Vaxabov o‘z tabrik so‘zida O‘zbekiston–Ozarbayjon hamkorligi tarixiy cho‘qqiga chiqqanini ta’kidladi. Unga ko‘ra, bu jarayon 13 ta hukumatlararo va idoralararo hujjatlar paketining imzolanishida o‘z ifodasini topdi. Mazkur hujjatlar ikki tomonlama aloqalarning huquqiy bazasini mustahkamlab, savdo, transport, energetika, sanoat, fan va ta’lim kabi asosiy yo‘nalishlarda yangi imkoniyatlarni ochib berdi.
Javlon Vaxabovga ko‘ra, joriy yilda ikki davlat o‘rtasidagi tovar ayirboshlash 30 foizga oshdi, maqsad – hajmni 1 milliard dollarga yetkazish. Hozirgi kunda qo‘shma loyihalar portfeli 4 milliard dollardan oshgan. Shuningdek, u 2025–2027-yillarga mo‘ljallangan Sanoat kooperatsiyasi dasturi ijrosini hamda mintaqaviy bog‘liqlikning strategik loyihasi sifatida O‘rta koridor ahamiyatini alohida qayd etdi. So‘nggi yillarda o‘zaro tashriflar faollashgani, Oliy Davlatlararo Kengash tashkil etilgani va kelishuvlarning tizimli, uzoq muddatli asosda amalga oshirilayotgani ta’kidlandi.
O‘zbekiston Respublikasi tashqi ishlar vaziri o‘rinbosari Bobur Usmonov Toshkent va Boku munosabatlari allaqachon ittifoqchilik darajasiga ko‘tarilganini, siyosiy ishonch darajasi esa xalqaro maydondagi muhim masalalarda pozitsiyalarni muvofiqlashtirish imkonini berayotganini bildirdi. Shu munosabat bilan O‘zbekiston va Ozarbayjon BMT, OTG, SHHT va boshqa tashkilotlar doirasida bir-birini faol qo‘llab-quvvatlayotgani, Markaziy Osiyo Davlat rahbarlari Maslahat uchrashuvlari hamda noyabr oyida bo‘lib o‘tadigan KVG‘GCA sammitida hamkorlikning alohida ahamiyat kasb etishi ta’kidlandi.
Ozarbayjonning O‘zbekistondagi Favqulodda va Muxtor Elchisi Husayn Guliyev xalqlarimizning madaniy va til jihatidan yaqinligini qayd etib, 1996-yilda aynan Toshkentda Ozarbayjonning Markaziy Osiyodagi birinchi elchixonasi ochilganini eslatdi. U, shuningdek, diplomatik munosabatlar o‘rnatilganining 30 yilligi arafasida o‘zaro to‘liq tushunish va ikki mamlakat rahbarlarining islohotlarga yo‘naltirilgan siyosati munosabatlarni yangi sifat bosqichiga olib chiqqanini alohida ta’kidladi.
Iqtisodiy rivojlanish masalalariga bag‘ishlangan muhokamalarda Ozarbayjon Iqtisodiy islohotlar va kommunikatsiyalar tahlil markazi xodimi Isa Gasimov Ozarbayjondan O‘zbekistonga eksport hajmining o‘sishini qayd etib, iqtisodiyotlarning o‘zaro to‘ldiruvchanligini ta’kidladi. U “Green and Digital Silk Road” xalqaro akseleratsiya dasturida o‘zbekistonlik startaplarning ishtiroki va innovatsion hamkorlikni chuqurlashtirish imkoniyatlari haqida ma’lumot berdi.
Shu munosabat bilan O‘zbekiston Energetika vazirligi bosh mutaxassisi Zafar Jabborov Markaziy Osiyo, Janubiy Kavkaz va Yevropani bog‘lovchi “Yashil energetika koridori” loyihasini hamda Ozarbayjondagi Alat EIZda faoliyat yuritayotgan “Turan Energy” qo‘shma korxonasining ishini alohida qayd etdi.
Transport va logistika bog‘liqligiga bag‘ishlangan qismda Ozarbayjon Milliy Majlisi deputati Fariz Ismoilzade ilg‘or texnologiyalar, jumladan, sun’iy intellekt va robototexnika sohalarida hamkorlik muhimligini ta’kidladi. Unga ko‘ra, bunday yo‘nalishlar harbiy va fuqarolik sohalarida amaliy qo‘llanadi va fuqarolarning kundalik hayotiga bevosita ta’sir ko‘rsatadi.
“Janubiy Kavkaz” siyosatshunoslar klubi rahbari Ilgar Velizade esa transport bog‘liqligi mintaqaning yangi geo-iqtisodiy va geosiyosiy manzarasini shakllantirayotganini qayd etdi. U Ozarbayjonning barcha besh Kaspiybo‘yi davlati va tashqi mintaqaviy o‘yinchilar bilan chegaradosh yagona davlat ekanini eslatdi. Mutaxassis, shuningdek, O‘zbekiston barcha besh Markaziy Osiyo davlati bilan chegaradosh ekanini ta’kidlab, bu jihat Xitoy–Qirg‘iziston–O‘zbekiston loyihasining ikki strategik makonni bog‘lovchi ahamiyatini oshirishini bildirdi. Velizade Boku–Tbilisi–Kars va Zangazur koridorini ham alohida tilga olib, aynan shunday yo‘laklar mintaqaning yangi transport arxitekturasini belgilashini qayd etdi. Shu bilan birga, u Kaspiy dengizining sho‘rlanishi kabi ekologik xatarlar transport infratuzilmasining barqarorligiga ta’sir qilishi mumkinligini ogohlantirdi.
Yakunida tomonlar kelishuvlarni izchil amalga oshirish savdo, sanoat kooperatsiyasi, energetika va transport loyihalari bo‘yicha belgilangan maqsadlarga erishishga imkon berishini bildirdilar. Tarix, til va madaniyatning mushtarakligi asosida qurilgan O‘zbekiston–Ozarbayjon hamkorligi Markaziy Osiyo va Janubiy Kavkazning barqaror rivojlanishida muhim omil ekanini yana bir bor tasdiqladi.
Muhokamalarda savdo-sarmoya va energetika sohalarida hamkorlik, jumladan “Yashil energetika koridori” loyihasi hamda Alat EIZdagi Turan Energy qo‘shma korxonasi faoliyati muhokama qilindi. Kadrlar tayyorlash, 60 dan ortiq oliy o‘quv yurtlari o‘rtasidagi kelishuvlar, madaniy va turistik almashinuvlar masalalari ko‘tarildi. Transport bo‘yicha Boku–Tbilisi–Kars, Zangazur va Xitoy–Qirg‘iziston–O‘zbekiston yo‘laklarining yangi mintaqaviy bog‘liqlik arxitekturasini shakllantirishdagi roli ta’kidlandi.
